Pixel 2 XL-ის ფასების და დიზაინის დათვალიერების შემდეგ, მისი პატარა ძამიკოს ჯერიც დადგა. Pixel 2-ს HTC დაამზადებს და მისი 64 და 128GB შიდა მეხსიერებიანი ვარიანტების ფასები შესაბამისად $649 და $749 იქნება.

კორპუსის დიზაინის მხრივ, სმარტფონის პატარა ვარიანტი ძალიან გავს მის დიდ ძმას, XL-ს, თუმცა სტანდარტული Pixel 2 სამ ფერში გაიყიდება. ეს ფერები იქნება “უბრალოდ შავი” (Pixel 2 XL-ის იდენტური), “აშკარად თეთრი” (Clearly White) და “მოლურჯო” (Kinda Blue). ბოლო ფერი აშკარად მხოლოდ Pixel 2-ზე გვხვდება. სურათებიდან იმის შემჩნევაც შეგვიძლია, რომ კორპუსის უკანა ნაწილის ზედა მხარეს განთავსებული შუშა უკვე სმარტფონის დიზაინის ფერს შეესაბამება და XL-ის მსგავსად სულ შავი არაა. გაურკვეველი მიზეზის გამო, Pixel 2 XL-ისგან განსხვავებულია კამერისა და LED განათების განლაგებაც.

Pixel 2-ის ფასები ბევრად უფრო მიმზიდველია, ვიდრე XL-ის. 64GB-იანი ვარიანტი $649, 128GB-იანი კი $100-ით მეტი, $749 დაგიჯდებათ. ეს იმას ნიშნავს, რომ გასული წლის მოდელების ფასებს 1 ცენტიც კი არ მომატებიათ. თუმცა, უნდა გავითვალისწინოთ, რომ შარშან საბაზისო მოდელის შიდა მეხსიერება 64GB-ს ნაცვლად 32GB-ს შეადგენდა.

Pixel 2-ისა და Pixel 2 XL-ის გამოსვლის შემდეგ, რომელიც 4 ოქტომბერსაა დაგეგმილი, მათი შეძენა ამ ლინკიდან შეგეძლებათ.

წყარო: Droid Life