Sony Xperia XZ Premium-ის ერთ-ერთი ყველაზე უნიკალური ფუნქცია მისი 4K HDR ეკრანია, რომელიც სმარტფონებში პირველი იყო. სულ რამდენიმე დღის წინ კი reddit-ის მომხმარებელმა აღმოაჩინა, რომ მოწყობილობას 120 ჰერციან რეჟიმზე გადართვა შეუძლია. ამგვარად, XZ Premium-ს აქვს სამი რეჟიმი: 1080p@60fps, 2160p@60fps და ბოლოს, აქამდე ყველასთვის უცნობი 1080p@120fps.

რა საკვირველია, აღნიშნულმა სიახლემ XDA-ს ფორუმი დაიპყრო. მალევე გამოქვეყნდა Android 8.1-ის ახალი ანაწყობი XZ Premium-ისთვის, რომელიც 120 ჰერციანი ეკრანის რეჟიმს ააქტიურებს. თუმცა, მომხმარებლები აქ არ გაჩერდნენ და GitHub-ზე ქექვის შედეგად დაადგინეს, რომ 120 ჰერციანი ეკრანი ასევე აქვთ Sony Xperia X, Xperia X Performance, Xperia XZ, Xperia XZ1, Xperia XZ1 Compact, Xperia XZ2 და Xperia XA2 Ultra სმარტფონებს! სამწუხაროდ, Xperia X Compact-ი დაიჩაგრა.

დიდი ალბათობით ძალიან მალე ვიხილავთ ახალ ანაწყობებს აღნიშნული სმარტფონებისთვის, რომელთა საშუალებითაც მოწყობილობის ეკრანის სრული პოტენციალის გამოყენება შეგვეძლება.

წყარო: XDA