წლის ყველაზე მასშტაბური მოვლენა ანდროიდ სამყაროში, Google I/O უკვე აქაა. ღონისძიება ტრადიციულად კალიფორნიაში ჩატარდება, თუმცა, რასაკვირველია, თვალის დევნება მსოფლიოს ნებისმიერი კუთხიდან შეგიძლიათ. Google I/O 2019-ზე დიდი დრო დაეთმება მიღწევებს ხელოვნური ინტელექტისა და მანქანური სწავლების სფეროში. ასევე ვიხილავთ Android Q-ს მესამე ბეტა ვერსიას, რომლისთვისაც დეველოპერებს უკვე შეეძლებათ აპლიკაციების გამოშვება. არ უნდა გამოგვრჩეს Stadia-ც, რომლის შესახებაც მეტ ინფორმაციას გუგლი ზაფხულში შეგვპირდა, თუმცა არაა გამორიცხული რომ რამდენიმე საიდუმლოს დღეს აეხადოს ფარდა. მოსალოდნელია ბიუჯეტური Pixel 3 მოწყობილობების წარდგენაც რამდენიმე ბაზრისთვის.

დამეთანხმებით, ამ ყველაფრის პირდაპირ ეთერში ხილვა ღირს. გუგლის დეველოპერების ქართული ჯგუფისა და გინფოს საშუალებით, ტრანსლაციის ყურება დიდ ეკრანზე, მეგობრულ გარემოში შეგიძლიათ.

I/O Extended 2019

7 მაისს, საღამოს 8 საათზე, ტერმინალი I/O Extended 2019-ს უმასპინძლებს. ღონისძიებაზე უზრუნველყოფილი იქნება დიდი ეკრანი, კარგი აუდიო სისტემა, სწრაფი ინტერნეტი და კვება. დარბაზი ირაკლი აბაშიძის 34 ნომერში მდებარეობს. რასაკვირველია, დასწრება უფასოა. არ აქვს მნიშვნელობა, დეველოპერი ხართ, დაინტერესებული მკითხველი თუ უბრალო მომხმარებელი – თუ გიზიდავთ სიახლეები ანდროიდ სამყაროს შესახებ, ყველანაირი უფლება გაქვთ, ღონისძიებას დაესწროთ. მეტი დეტალი Facebook-ისა და Meetup-ის ლინკებზე შეგიძლიათ იხილოთ.

ლაივსთრიმი

თუკი რაიმე მიზეზის გამო ღონისძიებაზე მოსვლას ვერ ახერხებთ, არ იდარდოთ. ტრანსლაციისთვის თვალის დევნება სახლიდანაც შეგიძლიათ. ქვემოთ მოცემულია ფანჯარა, სადაც Google I/O 2019-ის ტრანსლაცია უწყვეტ რეჟიმში მიმდინარეობს.