Asus-მა ახლახანს ახალი ჭკვიანი საათი, ZenWatch 3 გამოუშვა, რომლის სურათებმაც რამდენიმე კვირის წინ გაჟონა. მას აქვს მრგვალი ეკრანი, განსხვავებული დიზაინი და Snapdragon 2100 პროცესორი.

აღნიშნული საათი პირველია Asus-ისგან, რომელსაც მრგვალი ეკრანი აქვს. 1.39 ინჩიანი მრგვალი AMOLED ეკრანი 400×400 გაფართოებისაა. შეიძლება იგი რაღაცით Huawei Watch-საც მიამსგავსოთ. სხვა საათების მსგავსად, ZenWatch-იც 512MB ოპერატიული და 4GB შიდა მეხსიერებითაა აღუჭვილი.

აღსანიშნავია ისიც, რომ ZenWatch 3 არის პირველი საათი, რომელსაც Snapdragon 2100 აქვს. იგი შეიცავს ოთხ ბირთვიან A7 ჩიპს, რომელიც სპეციალურად საათებისთვისაა შექმნილი. ეს იმას ნიშნავს, რომ ZenWatch 3 თავის 340 მილიამპერიან ბატარეას მაქსიმალურად კარგად გამოიყენებს. Asus-ის განცხადებით, ამ ბატარეას 1-2 დღის განმავლობაში შეუძლია მუშაობა.

ZenWatch 3-ს 45 მილიმეტრიანი ქეისი აქვს და იგი 10.75 მილიმეტრის სისქისაა. ერთი შეხედვით მისი ღილაკებიც ზედმეტად დიდი ჩანს. საათი მალე €229-ად გაიყიდება.

წყარო: Asus